Arajo kunafoni surunmanw nsiriw ani hakilinan kolonw kunkan ka ɲɛsin kafoɲɔgɔnya bɛnkan ko ani bangekɔlɔsifɛɛrɛw ma

Script

Kunafoni surunman #1: Ni muso ko ayi, a b’a fɛ ka fɔ ayi!

KUMALASEBAA CƐ/ MUSO: O bɛ se ka kɛ cogo di ko Musow ka bila cɛw ka binkani wale kɔnɔ, olu minnu b’a fɛ k’u nege da hali n’o y’a sɔrɔ muso ko ayi.

Á y’aw janto! Ni bɛnkan tɛ ye, kafoɲɔgɔnya bɛ kɛ binkani ye.

Mali la, binkani bɛ jate iko kafoɲɔgɔnya suguya bɛɛ min bɛ kɛ ni binkani ye, ni wajibi ye walima a cunnen. Mali la a ɲangilen do sariya fɛ ka ta san duuru ka se san 20 kaso ma, ni a ɲangili wari min b’a ta 250000 ka se 800000F CFA ma.

O tuma ni muso ko ayi, a b’a fɛ ka fɔ ayi. Á y’a ka bɛnkan sɔrɔ fɔlɔ sani ka tɛmɛn kafoɲɔgɔnya wale furuso kɔnɔ. Nafan bɛ musow ka hakilinan la.

 

Kunafoni suruman #2: Hali furuso kɔnɔ, nafan bɛ bɛnkan na

KAJA: Mun bɛ ye Umu? Mun na e bɛ kasi?

UMU: Nteri, ne cɛ Musa de do (KASIW)

KAJA: A ye mun kɛ? A fɔ nye!

UMU: Ne bɛ ka jahama ɲɛnamaya ńka so. Musa bɛ da ni ne ye tuma caman hali ne a ni ne ma bɛn a kan. Kunun surɔ a ye ne wajibiya ka kafoɲɔgɔnya kɛ a fɛ. Sɛbɛ la, ne sɛgɛnnen do.

KAJA: O tuma a t’a dɔn ko a ka kan ka bɛnkan sɔrɔ e fɛ fɔlɔ hali ni e y’a furumuso ye?

UMU: Bɛnkan? A mago tɛ o la. Ale t’a fan fɛ fɛn bɛɛ ye ale ta ye du kɔnɔ ani a mago tɛ a muso ka bɛnkan na walisa k’a fɛn bɛɛ kan.

KAJA: A sera a dan na! An ka taa a ɲɛfɔ ne fa ye. Ale ye lafasabaa ye, ani a na dɔn min ka kan ka kɛ walisa k’a to a ka hakili sɔrɔ.

UMU: Ayiwa an ka taa!

KUMALASEBAA CƐ/ MUSO: O tɛ tiɲɛ kuma ye ko musow ka kan ka u cɛw nege da hali ni a ma di u ye. Hakɛ bɛ musow bolo ani u ka bɛnkan sɔrɔli ye wajibi ye sani ka kafoɲɔgɔnya kɛ, hali furuso kɔnɔ.

An ka an dege ka musow bonya!

 

Kunafoni suruman #3 Sariya bɛ fɛn min ɲɛsigi kafoɲɔgɔnya bɛnkan ko la?

SAJO GƐRƐN KUNTIGI: I n’i tile Usumani, mun bɛ ye?

USUMANI: Nteriw aw ni tile! Ni ye ne bɔ ye tɔ kalanyɔrɔ la, ani u kumana an fɛ kafoɲɔgɔnya bɛnkan ko la ani sariya bɛ min fɔ a ko la.

GƐRƐNADENW : Kafoɲɔgɔnya bɛnkan wa? A ɲɛfɔ!

USUMANI: Kafoɲɔgɔnya bɛnkan kɔrɔ ye mɔgɔ fila minnu si sera kafoɲɔgɔnya kɛli ma ni o ye san 18 ye Mali la, n’u bɛnnan a kan ka kafoɲɔgɔnya kɛ.

SAJO GƐRƐN KUNTIGI: Hah, ne y’a ye, nka ni mɔgɔ dɔ bɛ kafoɲɔgɔnya wale kɛ a muso walima a suguru fɛ ka sɔrɔ u ma bɛn a kan sariya bɛ mun fɔ o ta fan fɛ ?

 

USUMANI: Ni kafoɲɔgɔnya bɛnkantan dɔ kɛra sababu ye ka doni wale dɔ kɛ kafoɲɔgɔnya sira fɛ o mana kɛ a suguya o suguya ye, o ye binkani ye. Sariya bɛ ɲagili dɔ ɲɛsigi o kama o ɲangili b’a ta san duuru ka se san 20 kaso ma kafoɲɔgɔnya binkani wale kosɔn. O cogo doni wale o wale mana kɛ kafoɲɔgɔnya sira fɛ mɔgɔ dɔ la ka sɔrɔ o tigi ma jɛn ni a ye, o bɛ jate binkani ye. Ani binkani kɛbaa bɛ se ka ɲangili wari sara o min b’a ta wa 50000 ka se wa 160000 ma.

GƐRƐNANDENW : Hiiye!! O bɛɛ? Usumani i ni ce nin kunafoni kosɔn. O tuma la an bɛna an kɔlɔsi walisa an kana gɛlɛya sɔrɔ sariya fɛ.

KUMALASEBAA CƐ/ MUSO: Cɛw, aw ka kan ka aw furumuso ka bɛnkan sɔrɔ tuma bɛɛ sani aw ka kafoɲɔgɔnya kɛ a fɛ, aw furulen do o aw ma furu o, aw ka kan ka bɛnkan sɔrɔ fɔlɔ kafoɲɔgɔnya ko la .

Ayi ye ayi ye!

 

Kunafoni suruman #4 Kɔnɔtali foyi kana kɛ kalanyɔrɔ la

KUMALASEBAA CƐ/ MUSO: Kɔnɔtajoonaw ye denmusoniw ka kalan foorilibaliya sababuba dɔ ye.

K’a sababu kɛ u tɛ kunafoniw ɲumanw sɔrɔ, denmusoniw bɛ kɔnɔw ta u ma minnu laɲini, o min bɛ kɛ sababu ye u bɛ kalan jɔ joona.

O kɔnɔbaraw bɛ sɔrɔ tuma caman kafoɲɔgɔnya lakanabaliw kɛlen kɔ. Nka ni u tun ye bangekɔlɔsifɛɛrɛ matarafa, u tun bɛ se ka lakana kɔnɔmaya laɲinibaliw sɔrɔli ma ani ka taa ɲɛ n’u ka kalan ye.

Walisa u ka se ka k’u ka kalan kuncɛn ani k’u ka sugonw waleya, musomaniw ka kan k’u yɛrɛ lakana u kɛtɔ ka bangekɔlɔsifɛɛrɛ matarafa. O ye u ka siniɲɛgi konɛgɛ ye.

 

Kunafoni suruman #5 Bangekɔlɔsifɛɛrɛ denbaya ka hɛrɛ kosɔn

MUSA: Ńbalimankɛ! Kunu ne muso ko ne ma k’a ba fɛ ka bangekɔlɔsifɛɛrɛ kura dɔ matarafa iko an ka denyɛnni tɛ tɛmɛ kalo wɔɔrɔ kan fɔlɔ. E hakilinan ye jumɛn o ta fan fɛ?

KAWU: Ne kɔni ta fan fɛ, ne tɛ da farajɛ jamanaw ka fura ninnu la dɛ. Ne y’a mɛn yɛrɛ k’u bɛ konaya lase muso ma.

MUSA: Ayiwa ! Usu filɛ, dugu dɔgɔtɔrɔ joolen; Usu! Usu!

USU: Namu! Musa ne bɛ se ka mun kɛ e ye?

MUSA: Ne muso ko ne ma k’a ba fɛ ka bangekɔlɔsi fɛɛrɛ kura dɔ matarafa iko an ka denyɛni tɛ tɛmɛ kalo wɔɔrɔ kan fɔlɔ. Kasɔrɔ Kawu ko ne ma ko bangekɔlɔsifɛɛrɛ ninnu bɛna ni konaya ye. Yala tiɲɛ do wa?

USU: He Musa, Kawu! Aw kana da nin ŋunuŋunukan sinsin bali in na. O kunafoni tɛ tiɲɛ ye.Ɲan Mali la, an bɛ baara kɛ ni bangekɔlɔsifɛɛrɛw ye walisa ka bangeliw cɛ janya ɲɔgɔn na. An bɛ den hakɛ min fɛ an bɛ se k’o sɔrɔ ani a waati kelen na, nka a ka ɲi ka san fila furancɛ do bangeliw ni ɲɔgɔn cɛ. O b’a to den ka fa ba sinji la, ani a b’a to fana ba k’a yɛrɛ sɔrɔ jigini kɛlen kɔ walisa a ka janto a yɛrɛ la ani du kɔnɔ mɔgɔ tɔw la.

KUMALASEBAA CƐ/ MUSO: Bangekɔlɔsifɛɛrɛw ka ɲi. Ɲɔgɔn fɛ an k’an sendo banagekɔlɔsi fɛɛrɛ du ka hɛrɛ kosɔn.

 

Kunafoni suruman # 6 Fugulan nafamanw/ mananinw bɛ lakana kɛ kafoɲɔgɔnyabanaw ani kɔnɔmaya laɲinibaliw ma

MADU: Hey degekaramɔgɔ! Ne delila k’a mɛn ko ji min bɛ mananinw kɔnɔ k’o bɛ cɛ fagan dɔgɔya. Yala tiɲɛ do wa?

DEGEKARAMƆGƆ: Ayi Madu, o tɛ tiɲɛ ye! Mananin matarafali tɛ fagan dɔgɔya lase cɛ ma abada. Mananinw bɛ taganli kɛ kɔnɔmaya laɲinibaliw ma nka o dɔrɔmu tɛ u bɛ lakanali kɛ kafoɲɔgɔnyabanaw ma. Ji min bɛ mananin ninnu kɔnɔ o ye magayali kɛlan dɔrɔmu de ye walisa ka nɔgɔya do kafoɲɔgɔnya kɛli la.

MADU: I ni ce kosɛbɛ degekaramɔgɔ. Sisan ne bɛna mananin matarafa kafoɲɔgɔnya kɛliw bɛɛ la. Ka kɛ denfa ye sisan , ne ye denmisɛnni ye o ma kojugu.

DEGEKARAMƆGƆ: O jɛlen do

KUMALASEBAA CƐ/ MUSO: Kafoɲɔgɔnya bɛɛ ta fan fɛ, á ye mananin matarafa cogo ɲuman na walisa k’aw lakana ani k’aw kafoɲɔgɔn lakana.

 

Kunafoni suruman # 7: Bangekɔlɔsifɛɛrɛ pikirilamanw ɲumanya

KUMALASEBAA CƐ/ MUSO: Ŋunuŋunukanw bɛ ka munumunu tun bangekɔlɔsifɛɛrɛ pikirilamanw ani a waati surunmanitaw kun kan. Dɔw b’a fɔ ko baga lase joli ma. Dɔ wɛrɛw b’a fɔ sɔnni a ka kɔnɔmaya bali kalo fila ka se saba, ko a bɛ kɔnɔmaya yɛrɛ bali kudayi.

O ŋunuŋunukanw tɛ tiɲɛ ye. Bangekɔlɔsifɛɛrɛ bɛ wele bila furaw ma minnu bɛ kɔnɔ sɔrɔliw bali ani ka bangeliw cɛ janya ɲɔgɔn na. A b’a to kamalenw ka u ka kafoɲɔgɔnya jaabɔ u seko la.

Bangekɔlɔsifɛɛrɛ pikirilamanw ye bangekɔlɔsifɛɛrɛw la fɛɛrɛ ɲumanba dɔ ye. U bɛ tangali kɛ kɔnɔtali ma kalo fila ka se kalo saba ɲɔgɔn ma. A matarafali tɛ kɔlɔlɔ jugu si lase mɔgɔ ka kɛnɛya ma ani a waati kunkunruni tɛmɛnen kɔ a tɛ muso bali ka kɔnɔta kura ye a bɛ baara la waati min kɔnɔ.

Bangekɔlɔsifɛɛrɛ ye yɛrɛsewa cogoya ɲuman ye mɔgɔ kelen kelenw ani furulenw bolo!

 

Kunafoni suruman # 8 Bɛnkan sɔrɔli tɛ farajɛ jamanaw ka ko dilanen ye

KUMALASEBAA CƐ/ MUSO: An b’a mɛn tuma dɔ la ko bɛnkan sɔrɔli kafoɲɔgɔnya ko ta fan fɛ, k’o ye farajɛ jamanaw ka hakilinan ye min b’a ɲini ka muso lamuruti cɛ kama.

Nka, bɛnkan sɔrɔli ye taabolo ye min bɛ muso lakana binkani wale suguya bɛɛ ma, kɛrɛnkɛrɛnnenya la kafoɲɔgɔnya binkani wale. Fɔlɔ musow tun jatelen bɛ iko bolofɛnw duw kɔnɔ ani kuma tun tɛ u bolo. U ka hakɛw tun tɛ jate ani u ka hakilinanw tun tɛ jate.

O de la nafan bɛ kafoɲɔgɔnya bɛnkan sɔrɔli la!

Musow ka hakɛ bonyali bɛ se ka an ka sigigaw kɛ jɛɲɔgɔnya ɲuman sigidaw la. O de y’a to sariyaw dɔw bɛ ye minnu bɛ ɲangili da cɛw kan, cɛ minnu bɛ kafoɲɔgɔnya ta ka ɲɛsin musow ka sɔrɔ u ma jɛn ni a ye.

An ka musow bonya! Bɛnkan fɔlɔ, kafoɲɔgɔnya kɔfɛ.

 

Kunafoni suruman # 9 Lawakisɛfagalaw tɛ farati ye

KUMALASEBAACƐ/MUSO: Aw delila ka ŋunuŋunukan mɛn min b’a fɔ ko lawakisɛfagalaw bɛ baara kɛ iko asidi, k’uw bɛ ŋɛɲɛ ani k’uw bɛ musoya kɔnɔna bɛɛ du wa?

O ŋunuŋunukan ye nkalon ye!

Lawakisɛfagalaw ye waati surumani bangekɔlɔsifɛɛrɛ suguya ye min bɛ da musoya kɔnɔ sanga 15 kafoɲɔgɔnya bɛɛ ɲɛ. O sanga 15 tɛmɛnen kɔ lawakisɛfagalaw bɛ baara kɛ, u bɛ lawajiw nagasi, k’u bali u kana se fankisɛ ma ani k’a gosi.

Lawakisɛfagalaw matarafali ka nɔgɔ. Bangeliw cɛ janyali ani ka tanga kɔnɔmaya laɲinibali ma fɛɛrɛ ɲumanba dɔ do.

Ɲɔgɔn fɛ an ka bangekɔlɔsifɛɛrɛ matarafa walisa ka du sanumanw jɔ.

 

Kunafoni suruman # 10 Danfara min bɛ bangekɔlɔsifɛɛrɛ matarafali ani sigiɲɔgɔnya degunen cɛ

KUMALASEBAACƐ/MUSO: Yala aw bɛ mɔgɔw cɛman minnu bɛ miiri ko bangekɔlɔsifɛɛrɛ matarafali bɛ sigiɲɔgɔnya degunen ko jija an ka sigidaw la wa?

Tiɲɛ la bangekɔlosifɛɛrɛ b’a ɲini ka bangeliw cɛ janya ɲɔgɔn na ani ka taganli kɛ kɔnɔmaya laɲinibaliw ma, ani aw ka nin mɛn ka ɲɛ, ko dɔw la a bɛ densɔrɔli ko gɛlɛyaw furakɛ.

Bangekɔlɔsifɛɛrɛw matarafali ni sigiɲɔgɔnya degunen ko tɛ ɲɔgɔn sira kan. Bangekɔlɔsifɛɛrɛw matarafali bɛ mɔgɔw dɛmɛ ka sɛwa u ka kafoɲɔgɔnya la u seko la ani ka du ka ɲɛnamaya hɛrɛman sankɔrɔta a kɛtɔ ka bangeliw cɛ janya ɲɔgɔn na. A bɛ kɛnɛya sabati denba ye ani den ye o min bɛ fɛɛrɛ ba sinji ma waati jan kɔnɔ. Ani a bɛ wari ko basigi du bɛɛ kɔnɔ.

Ɲɔgɔn fɛ an ka sɔn bangekɔlɔsifɛɛrɛ ma du ka ɲɛnamaya hɛrɛman kosɔn.

 

Kunafoni suruman # 11 «Alimɛtini » nafanw

FATU : Yadiko, i b’a dɔn ko ne bɛ kiimeni na ɲinɛ! Ne t’a fɛ ka kalan jɔ iko ne kɔrɔmuso kɔnɔtajoona kosɔn.

YADIKO : Jo b’i fɛ! walisa ka tagan o man, i ka kan ka bangekɔlɔsifɛɛrɛ dɔ matarafa.

FATU : Tiɲɛ do. Nka ne y’a mɛn ko bangekɔlosifɛɛrɛ min ye waati jan ta ye min tɔgɔ ye «Jadɛli» ye bɛ tunu farikolo kɔnɔ ni donna wolo jukɔrɔ. Ani ko a bɛ se ka na ni kɛnɛya ko gɛlɛya caman ye.

YADIKO : Humm ne ka mandi , kana da i ka kuma mɛn ta bɛɛ la. I jɔ, Ulematu filɛ, kɛnɛya baara kɛla. Ulematu.

ULEMATU: Namu ne ka mandiw! Ne bɛ se ka mun kɛ aw ye?

YADIKO : An y’a mɛn ko bangekɔlɔsifɛɛrɛ «Alimɛɛli» bɛ tunu muso farikolo kɔnɔ ani ko a bɛ se ka na ni kɛnɛya ko gɛlɛya ye.

ULEMATU : O tɛ tiɲɛ ye. Alimɛtini ye bangekɔlɔsifɛɛrɛ ye min bɛ waati jan kɛ. A bɛ mɛn fo ka se dan 5 ma ani a bɛ se ka bɔ tuma o tuma mana i ja. A bɛ do bolokala la wolo kɔnɔ. A ka ɲi kosɛbɛ. A bɛ se ka ye ani a tɛ tunu. Ni a bɔra farikolo, muso bɛ se ka kɔnɔ ta. Nka walisa ka jɛya a la ko aw bɛ k’a labaara cogoya ɲuman na, á ye taa kɛnɛyaso dɔ la ani ka kumaɲɔgɔnya kɛ ni kɛnɛya baarakɛla dɔ ye.

KUMALASEBAACƐ/MUSO: Ɲɔgɔn fɛ, nsiriw ani hakilinan kolon minnu bɛ bangekɔlɔsifɛɛrɛw kun kan, an ka olu kɛlɛ.

 

Kunafoni suruman # 12 DIU tɛ nɔrɔ den abada.

NANA : Ne buranmuso, ne y’a mɛn ko bangekɔlɔsifɛɛrɛ DIU bɛ nɔrɔ den na ba kɔnɔbara kɔnɔjiginni tuma la.

RASIDA: Iyee Nana! O tɛ tiɲɛ ye feyiwu!

Kunu, Ne tun bɛ kɛnɛyaso la ńka ɲɔgɔnkunbɛn hokumu kɔnɔ. Jiginikɛ muso ko DIU ye bangekɔlɔsifɛɛrɛ ye min bɛ waati jan kɛ, a bɛ se ka se san 12 ṃa, ani a bɛ se ka labɔ tuma o tuma min ka di i ye. Dɔnbaa ŋanaw bɛ a da denso kɔnɔ.

Bɛɛ tɛ se k’a do denso kɔnɔ. Dɔnbaa ŋanaw bɛ a bila cogo ɲumanba la denso kɔnɔ.

O cogo fana la, bɛɛ fana tɛ k’a matarafa. Aw mago bɛ sɛgɛsɛgɛli la kɛnɛya ko ta fan fɛ walisa k’a dɔn ni a bɛ bɛn aw farikolo ma.

DIU ka ɲi kosɛbɛ walisa ka taganli kɛ kɔnɔtali ma. Nka a labɔlen kɔ, muso bɛ se ka kɔnɔ ta.

NANA: Ah han! I ni ce nin kunafoniyaw bɛɛ kosɔn.

KUMALASEBAACƐ/MUSO: Ɲɔgɔn fɛ, an k’an sendo bangekɔlɔsifɛɛrɛ matarafali la du ka hɛrɛ kosɔn.

 

Kunafoni suruman # 13 Kogɛnni bangetigɛfurakisɛ tɛ baga ye

KUMALASEBAACƐ/MUSO: Ŋunuŋunukan min bɛ ka munumunu ko baga bɛ bangetigɛfurakisɛ la min bɛ dankari denba ni den ka kɛnɛya la, o tɛ tiɲɛ ye.

Tiɲɛ la, bangetigɛfurakisɛ ye cogo ye walisa ka kɔnɔtali bali kafoɲɔgɔnya binkanni dɔ kɛlen kɔ walima kafoɲɔgɔnya lakanabali dɔ kɛlen kɔ. Baga foyi tɛ a la ani nafan tɛ kɛ a matarafali ni a ma kunu lɛrɛ 72 furancɛ kɔnɔ kafoɲɔgɔnya kɛlen kɔ.

O bɛna ta, bangetigɛfurakisɛ ma kan ka matarafa tuma bɛɛ. A ka kan ka matarafa ni kogɛnni dɔ bɛ ye. Ni a kɛra ko a bɛ ta tuma bɛɛ, bangetigɛfurakisɛ bɛ se ka kɛnɛya ko gɛlɛyaba dɔw lawuli.

Kogɛni bangetigɛfurakisɛ ye cogoya ɲuman ye walisa ka tagan kɔnɔmaya laɲinibaliw ma. A bɛ npogotigi wa caman kisi kɔnɔtajoona ma ani ka furulenw tagan bangeliw gɛrɛɲɔgɔna kojuguw ma.

Ɲɔgɔn fɛ, an ka bangekɔlɔsifɛɛrɛ kunkan nsiriw ani hakilinan kolonw kɛlɛ.

 

Kunafoni suruman # 14 Bangekɔlɔsifurakisɛw ka ɲi

NANTƆGƆMA: Hee Bintu! E t’a dɔn ko hali bangekɔlɔsifɛɛrɛ furakisɛw matarafalen kɔ k’ u bɛ musow bali ka denw sɔrɔ wa? Ani ka fara o kan, i bɔra ka bangetigɛfurakisɛ min ta sisan, k’o nɔrɔlen bɛ to i kɔnɔbara kɔnɔ ani ko a bɛ se ka na ni saya ye wa?

BINTU : (YƐLƐ) Hee balimanmuso! E bɛ kuma kuntanw de lankali tuma bɛɛ. O kuma tɛ tiɲɛ fiyewu. Bangekɔlɔsifurakisɛw bɛ iko furakisɛ suguya tɔw. A talen kɔ a bɛ yɛlɛman farikolo kɔnɔ ani ka kɔnɔtali bali.

Nka walisa nafan ka ye u la, bangekɔlɔsi furakisɛw ka kan ka ta don o don waati kelen na. Ni furakisɛ pilakɛti dɔ bana, i ka kan ka taa ɲɛ ni dɔ wɛrɛ ye. U tɛ kɔlɔlɔ si lase kɛnɛya ma ani u tɛ muso bali cogo si la ka kɔnɔ ta u matarafalen kɔ. Baara bɛ kɛ n’u ye walisa ka bangeliw cɛ janya ɲɔgɔn na ani ka tagan kɔnɔmaya laɲinibaliw ma.

NATƆGƆMA: Sɛbɛla? O tuma munna mɔgɔw bɛɛ ŋunuŋunukanw canri? Kabini sini ne bɛ dɔ san ne yɛrɛ ye.(YƐLƐW)!

BINTU: Ka dɔ san i yɛrɛ ye! Ayi! Taa kɛnɛyaso la fɔlɔ ! Ye i bɛna kunafoni ɲumanw sɔrɔ bangekɔlɔsifɛɛrɛ suguyaw kan ani o b’a to i ka ɲɛnatɔmɔli jɛlen kɛ.

KUMALASEBAACƐ/MUSO: Ŋunuŋunukan minnu bɛɛ bɛ lankali bangekɔlɔsifɛɛrɛw kunkan olu bɛɛ tɛ tiɲɛ ye. Kunafoni ɲumanw ɲini ani ka bangekɔlɔsifɛɛrɛ dɔ ɲɛnatɔmɔ!

 

Kunafoni suruman # 15 Bangekɔlɔsifɛɛrɛ tɛna ni koli jɔli ye

AISATA : Uf! A laban! Ne b’a jigiya ko ne ka dɔgɔkun baroni kamalenw ani npogotigiw fɛ bangekɔlɔsifɛɛrɛw kun kan, ye nsiri caman ani hakilinan kolon caman fura ka bɔ ye.

KIYATU : Ayisa i ni tile, i bɛ cogo di?

AISATA : Oh ne ka mandi, ne bɛ kɛnɛya la! An tun tɛ ɲɔgɔn fɛ sisan ladamuli baro la wa?

KIYATU : Ɔwɔ! I b’a dɔn ka kuma o kumakunw na k’o ye ko dogolen ye wa! Ka da o kan ne maloyara ka ne ka ɲininkali kɛ jama na.

AISATA : Hee ne ka mandi! An ma kan ka an makun bangekɔlɔsifɛɛrɛ kun kan. I na cogo ɲɛna. I ka ɲininkali kɛ.

KIYATU: Ne y’a mɛn ko bangekɔlɔsifɛɛrɛw bɛna ni koli jɔli ye denmusoniw ma. Yala o sɛgɛsɛgɛlen do wa?

AISATA : O tɛ tiɲɛ ye feyewu. Bangekɔlɔsifɛɛrɛ tɛ koli jɔli lase muso ma. A matarafali yɛrɛ bɛ se ka konaya kɛnɛya furulen kuraw ta fan fɛ ani k’a to u ka den hakɛw sɔrɔ u bɛ min fɛ ani a tuma la.

KIYATU : I ni ce kosɛbɛ i ka kunafoniya ɲumanw dili la ne ma.

KUMALASEBAACƐ/MUSO: Á ye ni dɔn! Bangekɔlɔsifɛɛrɛw b’a to kamalenw ani npogotigiw ka u jabɔ ni u ka kafoɲɔgɔnya ye ka sɔrɔ u ma jɔrɔ kɔnɔmaya laɲinibali tali la ani ka bangeliw cɛ janya ɲɔgɔn na. Ɲɔgɔn fɛ, an ka bangekɔlɔfɛɛrɛ kunkan nsiriw ani hakilina kolon kɛlɛ.

 

Kunafoni suruman # 16 A ka kan ka bɛnkan sɔrɔ tuma bɛɛ!

KUMALASEBAACƐ/MUSO: Muso caman bɛ kafoɲɔgɔnya kɛ u cɛw fɛ ka sɔrɔ u diyaɲɛ ko tɛ, u bɛ kafoɲɔgɔnya kɛ cɛw fɛ cɛw ka kafoɲɔgɔnya nege kosɔn. U bɛ siran bagabagaliw ɲɛ walima muso caman furu bagabagaliw walima furusa ɲɛsiran.

Nka aw ka ni dɔn! Kafoɲɔgɔnya bɛnkantan bɛ jate iko binkani hali furuso kɔnɔ.

Mali la, binkani bɛ jate iko kafoɲɔgɔnya suguya bɛɛ min bɛ kɛ ni farinya ye, ni wajibi ye walima a cunnen. Mali la a ɲangilen do sariya fɛ k’a ta san duuru ka se san 20 kaso ma, ni a ɲangili wari b’a ta 250000 ka se 800000F CFA ma.

Ŋunuŋunukan minnu b’a fɔ ko dinɛ ani an ka laadaw b’a to cɛw ka kafoɲɔgɔnya kɛ u musow fɛ tuma o tuma ka di u ye ka sɔrɔ u ma u musow ka bɛnkan sɔrɔ, o ŋunuŋunukanw ye nkalon ye.

Cɛw! Á ye jɛya a la tuma ka bɛnkan sɔrɔ aw musow fɛ. Ni muso ko ayi o kɔrɔ ko ayi. Ni muso ma fɔ ɔwɔ, a kan bɛnkan TƐ aw bolo.